ՀԱՐԳԵԼԻ ԴԻՄՈՐԴ,
ՄԻՆՉԵՎ ԸՆԴՈՒՆԵԼՈՒԹՅԱՆ ԴԻՄՈՒՄ-ՀԱՅՏԸ ԼՐԱՑՆԵԼԸ ՈՒՇԱԴԻՐ ԾԱՆՈԹԱՑԻՐ ՀՀ ԲՈՒՀԵՐԻ ԸՆԴՈՒՆԵԼՈՒԹՅԱՆ ԿԱՐԳԻ ՀԵՏԵՎՅԱԼ ԴՐՈՒՅԹՆԵՐԻՆ
Ընդունելության դիմում-հայտը փոփոխման ենթակա չէ փաստաթղթերի ընդունման ժամկետի ավարտից հետո:
Ընդունելությունը բուհեր կատարվում է անվճար և վճարովի ուսուցման համակարգերում:
Դիմորդը կարող է մասնակցել մեկ կամ մի քանի բուհերի մինչև 2 անվճար և մինչև 8 վճարովի մասնագիտությունների մրցույթին: Դիմորդը կարող է հայտագրել ՀՀ տարբեր քաղաքներում գտնվող բուհերի մասնագիտությունները:
Ընդունելության մրցույթն անց է կացվում մեկ միասնական փուլով: Դիմորդը հայտագրած մասնագիտությունների մրցույթին մասնակցում է մրցութային քննությունից ստացած դրական միավորով` հարյուրերորդական մասի պահպանմամբ:
Ընդունելության մրցույթն անցկացվում է առաջին տողով ընտրված մասնագիտության` անվճար և վճարովի ուսուցման հայտի գերակայությամբ:
Հայտագրված առաջին մասնագիտության մրցույթով չանցած դիմորդների համար մրցույթն անցկացվում է ընդունելության դիմում-հայտում հայտագրված մասնագիտությունների հերթականությանը համապատասխան, եթե նշված մասնագիտություններում առկա են թափուր տեղեր:
Որևէ մասնագիտությամբ ընդունված դիմորդն այլևս չի մասնակցում հայտագրված հաջորդ մասնագիտությունների մրցույթին:
